Klar for Iron Man mot Captain America? Marvel brygger opp til «Civil War» på filmlerretet

I oppladninga til sin komande film «The Judge» har Robert Downey Jr. også brukt litt tid på å snakke om sine komande eskapadar som superhelt. Kjend som han er for å blant anna spele Iron Man i Marvels teikneserie-filmunivers, er det kanskje ikkje så rart at rykteboksen då er full av snakk om «Iron Man 4».

No har nokon kome til ryktets harde kjerne. Marvel ladar opp til å kaste superheltane sine inn i borgarkrig, den såkalla «Civil War»-historielinja, ifølgje Variety.

I teikneseria set historia superheltane mot kvarandre – især Captain America og Iron Man, som tek kvar si side i kampen om korvidt superheltar skal kunne ha hemmelege identitetar eller ikkje. Iron Man er open om sin identitet som milliardær og superhelt, medan Captain America ynskjer å gjere det mogeleg å halde det skjult.

Dette skal visst starte i den tredje «Captain America»-filmen, som kjem mai 2016. Downey Jr. skal ikkje ha signert kontrakta enno, men det er iallfall tett nok på til at han har hinta til det offentleg:

– Det er ein plan, og dei er veldig hemmelegheitsfulle, men det blir ‘andre ting’. Eg skal gjere ‘andre ting’ med Marvel, sa han på Letterman Show i førre veke.

Historia om heltane i intern krig mot kvarandre kan vere ein god idé for Marvel, om ikkje anna for å rokke litt ved lagdynamikken i serien – i staden for berre finne nye, stadig større skurkar, slik formelen stort sett har vore til no.

Teikneserieversjonen av handlinga tilførte litt fleire gråsoner i ei ellers ganske svart-kvit framstilling av ondskap og godskap, men korleis det vert gjort i filmen er meir usikkert. Visse smådetaljar, som at skurken Ultron i «Avengers 2: Age of Ultron» (mai 2015) i filmen er eit av Iron Mans vitskapeleg eksperiment gone-bad, er endra frå teikneseriene.

Noko anna interessant er at Variety viser til at det nesten ikkje vart «Civil War» i det heile teke, fordi Robert Downey Jr. krangla om å få ei større rolle i det ferdige manuset – som førte til at Marvel-sjef Ike Perlmutter kutta han heilt ut.

Igjen skal det ha vore Kevin Feige (tidlegare referert til som Marvels hemmelege våpen) som redda situasjonen.

Den siste tidas ryktemakeri har også blant anna gått på at Spider-Man til slutt vil ende opp som ein superhelt i Marvel-filmane, og ikkje i sitt eiget univers under Columbia Pictures. At «Civil War»-historielinja no er på planane kan styrke denne teorien, ettersom edderkopphelten er ei sentral brikke i historia.

Dette må dog takast med enorme klyper salt.

Korleis dette skal knytast opp mot tv-serieplanane er framleis usikkert. I teikneseria førte hendingane til at Iron Man vart direktør over agentorganisasjonen S.H.I.E.L.D., som allereie har sin eigen tv-serie hjå NBC (i Noreg på Viasat 4).

I mai til neste år startar «Daredevil»-serien opp – som den første av fleire seriar hjå Netflix – som også skal vere knytt til det større superheltuniverset me alt har sett i filmane.

Inntil vidare har Marvel bekrefta superheltfilmar fram til 2019.